Бұл бастама қаржылық тұрақтылықты қамтамасыз етуге және цифрлық активтерді реттеуге бағытталған. Бұл туралы Цифрлық даму министрлігі мәлімдеді.

Мемлекеттік органдар қазір халықаралық тәжірибені зерттеп жатыр. Әсіресе, Швейцария, Сингапур және БАӘ сынды елдердің әдістері терең талданып жатыр. Себебі бұл мемлекеттер цифрлық активтерді тиімді басқарып отыр. Қазақстандағы криптоқорды Ұлттық банк басқарады деп жоспарланған.

Аңсар Әмрин, ҚР ЦДИАӨМ Цифрлық активтер индустриясын дамыту басқармасының бас сарапшысы:

- Біз Қазақстанның инвестициялық тартымдылығын арттыруға ден қойып жатырмыз. Ол үшін мемлекеттік органдармен бірлесіп импортталған майнинг құрылғыларына салынатын ҚҚС алып тастау бойынша жұмыстар жүріп жатыр. Сонымен қатар майнерлерге цифрлық активтерін тек Халықаралық қаржы орталығы биржаларында сату міндетін алып тастамақпыз. Қазір елімізде 60-тан астам компания мен 12 криптобиржа жұмыс істеп тұр.

Сарапшылардың айтуынша, елімізде криптоиндустрия қарыштап дамып келеді. Мәселен, қазір пилоттық режимде CryptoCity арнайы аймағы іске қосылмақшы. Онда цифрлық валюталар еркін айналымда болады. Яғни, түрлі төлемдер жасап, жылжымайтын мүлік сатып алуға, инвестициялауға мүмкіндік берілмек. Бұл жоба елімізге мықты мамандарды тартып, криптонарықтың дамуына серпін береді деп күтілуде.

Еске сала кетейік, бұл ерекше аймақ туралы Мемлекет басшысы Астана халықаралық форумында мәлімедеген болатын.

Гимран Абдрахманов, сарапшы:

- Қазір криптовалютаны қолма-қол ақшаға сатып алу мүмкін емес. Енді бұл нарыққа Ұлттық банк араласса, арнайы криптоайырбастау орындары ашылуы мүмкін. Олар «Алатау сити» немесе АХҚО сияқты арнайы аймақтарда болады деген ойдамыз. Бұл еліміздегі цифрлық технологиялардың дамуына оң әсер етеді. Сонымен қатар нарықтағы мықты ойыншылардың қызығушылығын тудырады.