Наурызнамаға сәйкес 17 наурыз — Мәдениет және ұлттық салт-дәстүр күні.

Мәдени мұра, өнер мен ұлттық салт-дәстүрлерді насихаттайтын маңызды мерекеде ҚР ІІМ Ұлттық ұлан әскери қызметшілері қыз-келіншектерге "Селтеткізер" сыйын тарту етті, деп хабарлайды inbusiness.kz сайты Polisia.kz порталына сілтеме жасап.

Елорда тыныштығын күзететін әскери жасақ жауынгерлері бұл күні нәзік жандыларға әдемі оюлармен көмкерілген әшекей бұйымдар таратты. Күтпеген жерден ұлттық нақыштағы сақина, білезіктерге ие болған аяулы аналар мен қылықты арулар, тіпті кішкентай бүлдіршін қыздар да қуанышқа бөленді.

Наурыз – жыл басы. Дәл осы сәтте күн мен түн теңеледі. Мұны ақ пен қараның, жақсылық пен жамандықтың теңескеніне балаған халық ұйықтамай, той-думанмен жаңа таңды қарсы алған.

Жастар түні бойы алтыбақан теуіп, ауылдың алты ауызын айтып, қыздар өздерін ұнатқан жігіттерге "Ұйқыашардан" дәм татқызса, жігіттер оларға "Селтеткізер" сыйлаған.

"Ұйқыашар" – қазақ халқының дәстүрі. Наурыз тойында қыз-келіншектер жігіттер ұйықтап қалмасын деп, жақсы тағамдардан "Ұйқыашар" дайындаған. "Ұйқыашар" қыз-жігіттердің сезімін арттыра түсуіне себепші болған.

Ал, жігіттер "Ұйқыашардан" дәм татқан соң, қыз-келіншектерге айна, тарақ, әшекей бұйымдарын сыйлаған. Мұны "Селтеткізер" деп атайды.