Солтүстік Қазақстан облысында былтыр бірінші рет қазақ әйелі аудан басқаруға тағайындалды. Ол – Аққайың ауданының әкімі Жанар Поселкеқызы Құсайынова.

Жанар Құсайынова – Шал ақын ауданының Афанасьевка ауылының тумасы. Отбасындағы алты баланың үлкені Жанар жастайынан еңбекқор, кіші інілері мен сіңлілеріне қамқор, олардың сабақтарына көмектесіп, ата-анасының көмекшісі болып өседі. Әкесі Поселкенің жұмыстан қажымай, таң атпай үйден кетіп, түнде бір-ақ оралатын еңбекқорлығы қатты әсер етеді.

Кезінде осы төңіректе Еңбек, Ақсу, Жаңасу деген қазақ ауылдары болған. Солтүстік өңірдегі басқа қазақ ауыл­дары сияқты, бұларға да жол салынбаған, су тартылмаған, тұрғын үйлердің сапасы төмен. Сондықтан оларды жергілікті билік болашағы жоқ ауылдардың қатарына қосып қойған. Дегенмен бұл ауылдардың тарихы тереңде. Басқа тарихын былай қойғанда, мұнда дүлдүл ақын, мемлекет және қоғам қайраткері Кәкімбек Салықов туған. Сол кісінің ықпалы, әлде басқа себебі болды ма, әйтеуір 1979 жылы осы үш ауыл­дан кілең қазақ тұратын «Еңбек» кеңшары құрылады. Жан-жақта жүрген осы ауылдардан шыққан мамандар шақырылып, «туған ауылдарымызды көркейтейік» деген ұран да тасталған. Облыс орталығындағы Қаттай Кеншінбаев деген белгілі адам басқаратын одақтық «Союзцелинвод» тресі кеңшарды қамқорлығына алып, оның барлық қажеттілігін өтейді. Трест ауылдарға тамаша тұрғын үйлер, мектеп, сауда, мәдениет орталығын, спорт алаңдарын тұрғызып береді. Үш ауылға да жол салып, таза ауызсу жеткізеді. Сөйтіп, кешегі депрессивті деген қазақ ауылдары жайнап сала береді.

Жанардың әкесі де «Афанасьев» кеңшарындағы зоотехник қыз­метін тас­тап, «ауылдарымызды көр­кейтейік» деген ұранды қолдап, туған жері «Жаңасу» ауылына көшіп келіп, осында бөлімше басқарушысы болып қызметке тұрады. Бөлімше басқарушысының жұмысы кеңес жылдарында шетсіз-шексіз жауап­кершіліктен тұратын тынымсыз еңбек еді. Ол ауылдың барлық эко­номикалық, әлеуметтік, мәдени-тұрмыстық, денсаулық, тіпті білім мен қоғамдық тәртібіне дейін бақылап, барлық істеріне жауап беретін. Балалары әкесін түскі асқа келгенде, үйде болса ғана көріп қалатын, әйтпесе апталап көре алмаған кездері де болған. Жанар әкесіне жаны ашып, оған бір көмегін тигізуді ішінен үнемі ойлап жүретін. Кейде тіпті есеп-қисап қағаздарын да қарасып, оларды түсінуге, есептерін шығаруға тырысатын. Аналары Мағрипа да балалар мен үй шаруасының тынымсыз тірлігінен, әкесін күтіп, оның ас-суын жасаудан қолы тимейтін. Осындай отбасынан шыққан балалар тегіс еңбекқор болып өсіп, кейін бәрі де бір-бір саланың маманы атанды.

Жанар «Афанасьевка» селосында тұрғанда орыс мектебінің есігін ашқандықтан, оқуын жақын маңдағы Новопокровкаға барып жалғастыруға мәжбүр болады. Жа­сы­нан еңбекқорлық пен жауап­кер­шілікті бойына сіңірген жас мектепті жақсы бітіреді. Сол жылы әкесінің ақылымен Алматыға барып, Халық шаруашылығы институтының бухгал­терлік есеп және шаруашылық жұ­мысын талдау мамандығын дайындайтын факультетке құжат тапсырады. Бір кездері еліміздегі ең үздік экономикалық жоғары оқу орны саналатын бұл бірегей институтқа түсу аса қиын болатын. Жанар талмай талаптанып, дайындалып, емтиханды ойдағыдай тапсырып, оқуға түседі.

Мектепте алған білімі нығыз, еңбекқорлығы ерен, мінезі салмақты қыз оқу орнын жақсыға бітіріп, 1988 жылы туған жеріне оралады. Бірден Тимирязев аудандық білім бөлімінің бас бухгалтері қызметіне бекітіліп, жас маман бұл қызметті аз уақытта шырқ үйіріп алып кетеді. Бірнеше жылдан кейін көрші Шал ақын ауданындағы зейнетақы қорын басқаруға шақырылады. Аудан әкімі Жанар Поселкеқызының іскерлігін, алымдылығын, білімділігін, адамдармен жұмыс істей алатын қоғам­дық белсенділігін бағалап, оны аудан әкімінің экономикалық мәселе­­лер жөніндегі орынбасары етіп таға­йын­­дайды. Осы қызметте жүріп

аудан экономикасының қыр-сы­рын та­нып, біршама жыл абырой­лы қызмет атқарды. Білімін де үз­дік­сіз жетілдіріп, М.Қозыбаев атын­дағы Солтүстік Қазақстан универси­тетін сырттай оқып, құқықтану мамандығын алады.

Одан әрі Ж.Құсайынова Мағжан Жұмабаев ауданы әкімінің орынбасары, облыстық ауыл шаруашылығы басқармасы бастығының орынбасары, облыс әкімінің мемлекеттік сатып алу басқармасының басшысы сияқты қызметтерден өтіп, білігін шыңдап, тәжірибесін молайтады. Былтырғы тамыз айында облыс әкімі оны Президент Әкімшілігі мен аудандық мәслихаттың келісімімен аудан әкімі етіп тағайындады.

Аудан үлкен жолдың үстінде, инфрақұрылымы дамыған, экономикасы тұрақты болса да, былтыр әлеуметтік-экономикалық дамуы жөнінен оныншы орынға құлдыраған еді. Жанар Поселкеқызына бұл бірден зор сынақ болды. Алайда мол тәжірибелі маман мызғымады. «Құтты қонақ келсе, қой егіз табады» дегендей, былтырғы жылдың қорытындысында аудан астық орудан облыста бірінші орынға шығып, 410 мың тонна астық бастырды.

«Алда ұлан-ғайыр міндет тұр. Аудан экономикасы мен әлеуметтік мәселелерін шешуде «Дайындық Агро», «Зенченко и К», «Облыстық тәжірибе стансасы», «Гердт В.В.» ШҚ сияқты озық шаруашылықтарға сүйенеміз. Олардың тәжірибесін басқаларға таратуға тырысамыз. Биыл егіс алқабын 2,7 мың гектарға ұлғайтып, барлығы 217 мың га жерге астық сеппекпіз. Бірнеше шаруашылықтың бордақылау алаңдарын ашуына да қолұшын бердік. Көптеген әлеуметтік мәселелерді шешуді де белгілеп қойдық. Қысқасы, аудан әкімінің жұмысы ешқашан бітпейді. Тек жауапкершіліктен қашпай, оларды батыл қолға ала білу керек», дейді Ж.Құсайынова. Іскер жан мойнына алған міндеттерін тыңғылықты да тиянақты атқарарына сенім мол.

Бос уақытында әкім қолындағы немересі Сараға көңіл бөлуді, қазақ әндерін тыңдауды, дене ширату амалдарын жасап, фитнеске барғанды жақсы көреді екен. «Кітап, газет қарап, күнделікті жаңалықтарды да құр жібермеуге тырысамын», дейді ол.

Солтүстік Қазақстан облысы,

Аққайың ауданы